በደቡብ አፍሪካ ከሣምንት በፊት በተካሄደው ምርጫ መንግሥት ለመመሥረት የሚያስችል አብላጫ ድምፅ ያገኘ ፓርቲ ባለመኖሩ፣ የፖለቲካ ፓርቲዎች የቅንጅት መንግሥት ለመመሥረት በመምከር ላይ ናቸው።

የሀገሪቱ ፕሬዝደንት ሰሪል ራማፎሳም ሁሉም ወገኖች በመተባበር መንፈስ በጋራ እንዲሠሩ ጠይቀዋል።

ፓርቲያቸው የአፍሪካ ብሔራዊ ኮንግረስ (ኤ ኤን ሲ) ሃገሪቱ ከዘር መድልኦ አገዛዝ ከተላቀቀች ወዲህ ዝቅተኛ የሆነ ድምፅ አግኝቷል። በምርጫው ኤ ኤን ሲ 40 በመቶ ድምፅ በማግኘት ከፍተኛውን ውጤት ቢያስመዘግብም፣ መንግሥት ለመመሥረት ግን በቂ ድምፅ አልሆነም።

“ሃገሪቱ ለአዲስ ዲሞክራሲያዊ አስተዳደር በመዘጋጀት ላይ በመሆኗ፣ ሁሉም ፓርቲዎች ለተሃድሶና ለለውጥ በአንድነት መሥራት ይገባቸዋል” ብለዋል ራማፎሳ።

ኤ ኤን ሲ ሰፊ ልዩነት ካላቸው ቀኝም ሆነ ግራ ዘመም ፓርቲዎች ጋራ በመሆን ብሔራዊ አንድነት መንግሥት ለመመሥረት ፈቃደኝነቱን ገልጿል።

አዲሱ ፓርላማ በሣምንት ውስጥ ሥራውን የሚጀምር ሲሆን፣ የመጀመሪያ ተግባሩም አዲስ መንግስት ለመመሥረት ፕሬዝደንቱን መምረጥ ይሆናል።