• Wasu ‘yan daba da suka kware wajen satar waya da sauran laifuka sun kashe wani jami’in soja mai suna Laftanar I.M Abubakar
• An ruwaito cewa masu kwacen wayar sun kashe sojan ne a Unguwan Sarki da ke cikin birnin Kaduna a hanyarsa ta komawa gida
• Tsohon sanatan Kaduna, Shehu Sani ya yi Allah wadai da wannan aika-aika tare da yin kira ga jami'an tsaro da su kamo masu laifin

Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Jihar Kaduna - Rahotanni sun bayyana cewa wasu ‘yan daba da suka kware wajen satar waya da sauran laifuka sun kashe wani jami’in soja mai suna Laftanar I.M Abubakar.

An ruwaito cewa masu kwacen wayar sun kashe sojan ne a Unguwan Sarki da ke cikin birnin Kaduna a cikin makon nan.

Shahararren masani kan yaki da tada kayar baya kuma mai sharhi kan harkokin tsaro a tafkin Chadi, Zagazola Makama ya bayyana hakan a shafinsa na Twitter.

LURA: Shin kana son bamu labari da tattaunawa da marubutanmu? Tuntubemu a info@corp.legit.ng

Masu kwacen waya sun kashe soja

Makama ya bayyana Abubakar a matsayin jami'in soja mai hazaka wanda aka kashe a hanyarsa ta komawa gida.

Sanarwar Makama na cewa:

“Masu satar waya sun kashe wani matashin jami'in soja mai hazaka, Laftanar I.M Abubakar (Isa) akan hanyarsa ta komawa gida a Unguwan Sarki, Kaduna.

"Muna addu'ar Allah ya jikan sa da Rahama, ya sa ya huta."

Shehu Sani ya yi Allah wadai

Da yake tsokaci kan kashe Laftanar I.M Abubakar, tsohon sanatan Kaduna, Shehu Sani ya yi Allah wadai da wannan aika-aika da masu kwacen wayar suka yi.

Kamar yadda ya wallafa a shafinsa na Twitter, Shehu Sani ya ce:

"Rahotan kashe Laftanar Abubakar da wasu barayin waya suka yi a Unguwar Sarki dake cikin birnin Kaduna, abin takaici ne kuma abin Allah wadai.

Yawaitar rahotannin hare-hare da ke da alaka da kwacen waya a birane ya fara zama abin tsoro. Dole ne hukumomin tsaro su kamo wadanda suka aikata wannan aika aikar."

Shehu Sani ya mika sakon ta'aziyya ga iyalan marigayi Laftanar I.M Abubakar tare da addu'ar Allah ya jikan sa da Rahama.

Amarya ta datse mazakutar ango

A wani labarin, mun ruwaito cewa wata amarya mai suna Habiba Ibrahim ta sa wuka mai kaifi ta yanke mazakutar angonta Salisu Idris a garin Kudan, jihar Kaduna.

An gano cewa ma'auratan sun yi auren soyayya ne kuma duka duka watannin su biyar da yin auren a lokacin da Habiba ta yi wannan aika-aikar sa'ilin da Salisu ke barci.

Asali: Legit.ng