Home
Back
[ክቡር ሚኒስትሩ ሰሞኑን በተጀመረው አገራዊ የምክክር መድረክ ላይ ስለተላለፉ መልዕክቶች በተመለከተ ከባለቤታቸው ጋር እያወጉ ነው]
ethiopianreporter.com
2024/7/6
እኔ ምልህ?
እ… አንቺ የምትይው?
አለቃህ በምክክር መድረኩ ላይ ያስተላለፉትን መልዕክት አደመጥክ?
አዎ፡፡
የሚገርም እኮ ነው አልተገረምክም?
ምኑ ነው የሚያስገርመው?
ለኢትዮጵያ የሚበጀውን ምከሩና አምጡ ብለው የምክክር መድረክ እንዲዘጋጅ ካደረጉ በኋላ እንዴት እንደዚያ ዓይነት መልዕክት ያስተላልፋሉ?
ምን አሉ? ተገቢ ያልሆነ መልዕክት አስተላልፈዋል እንዴ?
ንግግሩን አድምጫለሁ ስትል አልነበር እንዴ?
እሱማ አድምጫለሁ።
ታዲያ መልዕክቱን እንዴት አልሰማህም?
ሰምቻለሁ ግን እንደ አንቺ የተለየ ትርጉም አላገኘሁበትም። ይልቅ ለምን ያሉትን አትነግሪኝም?
የምክክሩን ውጤት መንግሥት መቶ በመቶ ይቀበላል አሉ።
ታዲያ ይህን ማለታቸው ጥሩ አይደለም እንዴ?
እጅግ ትልቅ ነገር ነው እንጂ፡፡
እና?
እኔም ይህን ሰምቼ እውነትም ቁርጠኛ ሆነዋል ብዬ ሳልጨርስ ሌላ ነገር ተናገሩ።
ምን አሉ?
ከዚህ በኋላ የሸግግር መንግሥት ኢትዮጵያ ውስጥ አይኖርም እንዳታስቡት ብለው እርፍ፡፡
ታዲያ እንደዚያ ማለታቸው ምን ያስገርማል?
በምክክሩ የሚሳተፉ የሕዝብ ተወካዮች ተወያይተው ስምምነት የሚደርሱበት አንዱ ጉዳይ የሽግግር መንግሥት ይቋቋም የሚል ቢሆንስ?
እህ… በዚህ መልኩ አላየሁትም ነበር።
እንዴት?
የሽግግር መንግሥት ይቋቋም የሚል ሐሳብ ከምክክር ሒደቱ ሊመጣ ይችላል ብዬ አላሳብኩም ነበር።
አንተ ከምክክር ሒደቱ የሚገኘው ውጤት ምን ሊሆን ይቻላል ብለህ ነው የምታስበው?
ማ… እኔ?
እ…?
ለምሳሌ መንግሥታዊ ሥርዓቱ ፕሬዚዳንታዊ ይሁን የሚል ሐሳብ ሊቀርብ ይችላል።
እሺ …ሌላስ?
ሌላ… የፖለቲካ ፓርቲዎች በብሔር እንዳይደራጁ በሕግ ይከልከል የሚል ሐሳብ ሊቀርብ ይችላል።
እሺ ሌላስ?
ሰንደቅ ዓላማውና ሕገ መንግሥቱ ይሻሻል ሊባል ይችላል።
ቆይ ግን ምክክሩ የሚካሄደው ለኢትዮጵያ የሚበጀውን ሐሳብ ለማቅረብ አይደለም እንዴ?
ነው እንጂ፡፡
ታዲያ ግልጽና ተዓማኒ ምርጫ ለማካሄድ ሲባል የሽግግር መንግሥት ይቋቋም የሚል ሐሳብ ቢቀርብ ምንድነው ችግሩ?
ችግር የለውም፡፡
ችግር ከሌለው ይህንን አማራጭ ዝግ ማድረግ ለምን አስፈለገ?
ያው… በሕዝብ የተመረጠ መንግሥት እያለ የሽግግር መንግሥት ማቋቋም ተገቢ ባለመሆኑ እንጂ…
እንጂ ምን?
ችግር ያለው አይመስለኝም።
ይህን ሐሳብ የሚያቀርበውም እኮ ሕዝብ ነው።
የትኛው ሕዝብ?
በምክክር ሒደቱ የሚሳተፉ የሕዝብ ተወካዮች ናቸዋ?
እንደዚያ ከሆነ ችግር የሚኖረው አይመስለኝም።
እሱን የምትለው አንተ ብቻ ነህ።
እንዴት?
አለቃህ የሽግግር መንግሥት የለም ብለው በሩን ዝግ አድርገውታላ? ብቻ የዚህ አገር ነገር ማለቂያ የለውም።
እንዴት?
በአለቃህ ንግግር ተደንቄ ሳልጨርስ ሌላ አስደናቂ ነገር ከተፍ ይላል።
ሌላ ምን መጣ?
የሽግግር መንግሥት አይታሰብም መባሉ ተገቢ ነው ወይ? ተብለው የተጠየቁት የምክክር ሒደቱ መሪ የሰጡት ምላሽ ነዋ?
እሳቸው ምን ምላሽ ሰጡ?
የሽግግር መንግሥት የሚባል ነገር ሊቀርብ አይችልም የተባለው በምክክር ሒደቱ መጨረሻ ላይ አይደለም አሉ።
እና መቼ ነው?
ይህ ሐሳብ ከምክክር ሒደቱ በፊት መነሳት የለበትም ነው የተባለው።
ምን?
ይሄን ብቻ መሰለህ እንዴ ያሉት?
እና… ሌላ ምን ብለዋል?
የምክክር ሒደቱ ሲጠናቀቅ የሽግግር መንግሥት አስፈላጊነት ላይ ስምምነት ከተደረሰ ለመንግሥት ይቀርባል ብለው ቁጭ።
እንደዛ አይሉም።
አሉ ስልህ?
ያሉትን የሚያደርጉት ከሆነ…
እ… የሚያደርጉት ከሆነ ምን?
ይበሉ፡፡
ጠብቆ ነው ላልቶ?
ምኑ? …ሴትዮ ያምሻል!
Continue reading
People are also reading
[ክቡር ሚኒስትሩ ከሚያከብሯቸው አንድ የቀድሞ ጉምቱ ፖለቲከኛ ስልክ ተደውሎላቸው እያወሩ ነው]
3 days ago
ethiopianreporter.com
[ክቡር ሚኒስትሩ በመንግሥት የሚታወጁ ንቅናቄዎችን በተመለከተ ባለቤታቸው ለሚያነሱት ጥያቄ ምላሽ ለመስጠት እየሞከሩ ነው]
2024/7/6
ethiopianreporter.com
- Advertisement -
2024/7/6
ethiopianreporter.com