Jirgi Ya Gamu da Hatsari Ana Tsaka da Ruwan Sama, Mutane Sun Mutu a Arewa
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Jihar Niger - Wasu mutum ‘yan uwam juna sun rasa rayuwarsu yayin da wani jirgin ruwa ya kife a ruwa a kauyen Lippo da ke karamar hukumar Mokwa a jihar Neja.
Habibu Wushishi, daraktan yada labarai da dabaru a ma’aikatar jin kai da magance bala’o’i na jihar ne ya bayyana hakan a wata sanarwa da ya fitar ranar Lahadi a Minna.
Wushishi ya bayyana cewa jirgin ya yi hatsari ne da misalin ƙarfe 10:00 na daren ranar Alhamis, 20 ga watan Yuni, 2024, kamar yadda Premium Times ta kawo.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Ya ce waɗanda hatsarin ya rutsa da su duk masu kamun kifi ne watau masunta kuma sun fito sana'arsu ne lokacin da jirgin ya nutse da su.
"Masuntan suna cikin kamun kifi a kogin Niger yayin da kwale-kwalen ya kife da su saboda tsananin ruwan saman da ke sauka tare da iska mai ƙarfi.
"Zuwa yanzun mun tsamo gawar ɗaya daga cikinsu kuma ana ci gaba da aiki ba kama hannun yaro domin ciro gawar ɗayan masuncin da haɗarin ya rutsa da shi," in ji Wushishi.
A gefe guda kuma Wushishi ya ce wasu ‘yan bindiga sun kai hari a kauyukan Lanta, Tunga, Dnakau da Juweedna da ke yankin Erena a karamar hukumar Shiroro.
Sarautar Kano: Gingima-gingiman lauyoyi sun soki hukuncin kotu, sun zargi ƴan siyasa
Ya ce ƴan bindigar sun kai hare-haren ne da misalin karfe 5:30 na yammacin ranar 20 ga watan Yuni.
A cewarsa, ‘yan bindigar sun yi awon gaba da shanu da tumaki da yawa tare da lalata gidaje da dama, inda sama da mutane 600 suka rasa matsuguni.
Ya ce a halin yanzu ‘yan gudun hijira daga kauyukan da lamarin ya shafa na samun mafaka a sansanonin ‘yan gudun hijira na Erena da Kuta.
A wani rahoton kun ji cewa Ƴan bindiga sun kai mummunan hari garin Maidabino da ke ƙaramar hukumar Ɗanmusa a jihar Katsina, sun kashe bayin Allah`
Mazauna garin sun bayyana cewa yawan ƴan bindigar ya sa babu jami'in tsaron da ya iya tunkararsu, sun kuma tafi da mutane 50.
Asali: Legit.ng