Addu’a Ce Za Ta Kawo Karshen Rashin Tsaro a Najeriya, Shugaban Sojin Ruwan Najeriya
Salisu Ibrahim ne babban editan sashen Hausa na Legit. Kwararren marubucin fasaha, harkar kudi da al'amuran yau da kullum ne, yana da gogewar aikin jarida da rubuce-rubucen adabi sama da shekaru takwas
FCT, Abuja - Babban hafsan sojin ruwan Najeriya, Vice Admiral Emmanuel Ogalla, ya yi kira ga ‘yan Najeriya da su dukufa da addu’ar zaman lafiya, hadin kai da kuma ci gaba wajen fuskantar kalubalen da ake fuskanta.
Ya ce duk da cewa kasar nan na fuskantar kalubale masu tarin yawa ta fuskar tattalin arziki da tsaro, ya ce idan aka dukufa da addu’a, Allah zai ba da mafita.
Ya yi wannan batu ne a wani taron buda-baki da hukumar kula da harkokin addinin musulunci ta Najeriya ta shirya a azumin watan Ramadan na bana a Abuja.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
A cewarsa, duba da kalubalen zamantakewa da tattalin arziki a Najeriya, akwai bukatar ‘yan kasa su jajirce wajen neman taimakon Allah, Daily Trust ta ruwaito.
A cewarsa:
"Ina kira ga 'yan uwa musulmi da su ci gaba da yiwa wannan kasa addu'ar zaman lafiya da dawwamar tsaro."
A bangare guda, shugaban na sojin ruwa ya bayyana irin kokarin da shugaban kasa Bola Ahmad Tinubu ke yi wajen ganin an samu wanzuwar zaman lafiya a Najeriya, Politics Nigeria ta ruwaito.
Hakazalika, ya ce ya kamata 'yan Najeriya su koma ga Allah tare da sanya shugabanni a addu'o'i wajen ganin sun yi aikin da ya rataya a wuyansu.
Matsalar tsaro da tattalin arziki ne manyan abubuwan da suke damun 'yan Najeriya, kuma har yanzu ba a samu mafita ba.
A wani labarin, Yakubu Gowon, tsohon shugaban kasa na mulkin soja, ya roki 'yan Najeriya da su cigaba da kasancewa masu kishin kasa duk da matsalar rashin tsaro dake addabar kasar.
Ya ce lamarin wani bangare ne kawai wanda kasar za ta shawo kansa a karshe, musamman idan aka dukufa.
Gowon yayi magana ne a ranar Asabar a wajen bikin cika shekaru 23 ta Peace Corps of Nigeria (PCN) a Abuja, inda ya samu wakilcin Chris Garba.
Asali: Legit.ng