Tawagar ƙasashen Argentina da Canada dake buga gasar cin kofin kasashen kudancin Amurka sun samu nasara tsallakawa zuwa wasan gab da kusa da na karshe a rukunin A.

Argentina ta samu wannan nasara ne bayan doke kasar Peru 2-0 a wasan karshe na rukunin A da suka buga a daren jiya, inda ɗan wasan gaban tawagar Lautaro Martinez ya tura ƙwallaye biyu, ta farko a mintina na 47 sai ta biyu mintina 86.

Yanzu haka dai Lautaro Martinez ne yafi kowa yawan zura kwallaye a gasar, inda ya zura huɗu a raga jumilla, bayan ya zurawa Chile 1, Canada 1 sai kuma Peru 2.

Argentina dai ta ƙare wasannin rukuni da maki 9 bayan buga wasanni 3 ba tare da an zura mata kwallo ko ɗaya ba.

Canada kuwa ta samu nasarar tsallakawar ne a farko a tarihin ta, bayan buga kunnen doki 0-0 da Chile a daren jita Lahadi, tare da haɗa maki hudi jumulla.

Kawo yanzu dai mai rike da kofin Argentina ta ƙare a mataki na ɗaya da maki 9, Canada ta biyu da maki 4, Chile ta uku da maki 2 sai kuma ta karshe Peru da maki 1.

A daren yau za a barje gumi a wasannin karshe na rukunin B tsakanin Mexico da Ecuador sai Jamaica da Venezuela da ƙarfe 1 na dare.

Argentina ta samu nasara a wasanta da Peru ba tare Lionel Messi ba, saboda ɗan wasan bai gama murmurewa daga karamin raunin da ya samu ba.