- Darajar Naira ta faɗi kan Dalar Amurka a kasuwar musayar kuɗi ta gwamnati da ta ƴan canji a ranar Juma'a
- Duk da cewa darajar Naira ta ƙaru a farkon mako, daga baya darajar ƙuɗin na Najeriya sun yi ƙasa kan Dalar Amurka
- Tasirin faɗuwar darajar Naira dai zai shafi al’ummar Musulmi da ke fatan gudanar da bukukuwan Sallar Eid-el-Kabir a daidai lokacin da ake ƙara samun tsadar kayan abinci
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi
FCT, Abuja - A ranar Juma’a, 14 ga watan Yuni, 2024, darajar Naira ta faɗi a kasuwar ƴan canji.
A cewar ƴan kasuwar canjin kuɗin waɗanda aka fi sani da ‘Bureau de Change (BDC)’, darajar Naira ta faɗi zuwa N1,485 kan kowacce dala.
Naira ta kasa samun daidaito
Ƴan kasuwar canjin kuɗin suna siyan Dala kan N1,460 sannan su sayar da ita a kan N1,485, wanda hakan ya haifar da ribar N25, cewar rahoton jaridar TheCable.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Faduwar ta nuna an samu raguwar N5 ko 0.34% daga farashin N1,480/$ da aka samu wata guda da ya gabata a ranar 10 ga watan Mayu.
Haka kuma a ranar Juma’a da ta gabata, darajar Naira ta ragu da kaso 0.44%, wato N6.48, zuwa N1,482.72 kan kowacce dala a kasuwar musayar kuɗi ta FMDQ da ke kula da kasuwancin musayar kuɗaɗen waje a Najeriya.
A cikin sa'o'in ciniki, Dala ta kai sama da Naira 1,490 da kuma farashi mafi ƙaranci na N1,390. A wannan farashin, bambanci tsakanin kasuwar gwamnati da ta ƴan canji shine N2.28.
Faduwar darajar Naira za ta shafi bikin Sallah
Sau da yawa faduwar darajar Naira a kan Dala na shafar farashin kayayyakin abinci a kasuwanni, wanda hakan ke rage ƙarfin sayen kayayyaki na ƴan Najeriya.
Sai dai, a wannan lokacin tasirin faɗuwar darajar Naira zai shafi al'ummar musulmai wajen siyan kayan abinci da raguna domin bukukuwan Sallah.
Darajar Naira ta ƙaru
A wani labarin kuma, kun ji cewa darajar Naira ta ƙara tashi a kasuwar ƴan hada-hadar kuɗi ta bayan fage, inda ta dawo N1,500 kan kowace Dala ranar Talata, 28 ga watan Mayu.
Naira ta ƙasa farfaɗowa a jiya Talata daga N1,520 da aka yi musanyar kuɗin Najeriya kan kowace Dalar Amurka ɗaya a ranar Litinin, 27 ga watan Mayun 2024.
Asali: Legit.ng