Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi
FCT, Abuja - Fadar shugaban ƙasa ta musanta rahotannin da ke cewa Shugaba Bola Tinubu zai yi jawabi ga majalisun tarayya guda biyu a ranar Laraba.
Rahotannin dai sun ce shugaban ƙasan zai yi jawabi ne ga majalisun biyu a tare domin murnar cika shekara ɗaya a kan karagar mulkin Najeriya.
Mai magana da yawun shugaban ƙasan, Ajuri Ngelale ne ya musanta rahotannin jawabin shugaban ƙasan cikin wata sanarwa a shafinsa na Facebook.
A cikin sanarwar, Ajuri Ngelale ya bayyana cewa batun jawabin shugaban ƙasan ga majalisun guda biyu a ranar Laraba, 29 ga watan Mayu ƙarya ne.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
"Duba da bayanan da ake yi dangane da shugaban ƙasa zai yi jawabi ga zaman majalisun tarayya na tare a gobe Laraba, 29 ga watan Mayun 2024, yana da muhimmanci a bayyana cewa wannan bayanin ƙarya ne.
Kuma ba a amince da hakan ba. Ofishin shugaban ƙasa ba shi hannu a wajen shirya taron"
- Ajuri Ngelale
Idan ba a manta ba dai mai ba shugaban ƙasa shawara kan harkokin yaɗa labarai da dabaru, Bayo Onanuga, a ranar Talata ya ce Shugaba Tinubu ba zai yi jawabi ga ƴan ƙasa ba a ranar Laraba domin murnar cikarsa shekara ɗaya kan mulki.
A maimakon hakan, Onanuga ya ce Tinubu zai yi jawabi ga taron majalisun tarayyar domin tunawa da cika shekara 25 da mulkin dimokuraɗiyya a Najeriya.
Sai dai, mai magana da yawun shugaban ƙasan ya ƙaryata hakan.
Asali: Legit.ng