- Watanni takwas bayan da majalisar dattawa ta ki amincewa da shi, rahotanni sun ce tsohon gwamnan jihar Kaduna, Nasir El-Rufai, zai fara taƙaddama da gwamnatin Bola Tinubu
- Duk da cewa suna jam’iyya ɗaya, akwai alamun cewa El-Rufai da Shugaba Tinubu ba aminan juna ba ne
- Bayan da aka hana shi damar zama minista a 2023, haɗe da jita-jitar da ake yaɗawa na cewa yana sha'awar shugabancin Najeriya a 2027, El-Rufai ya yanke shawarar ɗaukar mataki
Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi
FCT, Abuja - Nasir Ahmad El-Rufai, tsohon gwamnan jihar Kaduna yana shirin "yaƙi" da Shugaba Bola Tinubu a aƙalla kotuna biyu.
Kamar yadda jaridar Vanguard ta ruwaito a ranar Asabar, 6 ga watan Afrilu, za a gabatar da faɗan ne a kotunan Najeriya.
El-Rufai na sa ran wanke sunansa daga zargin cewa yana da hatsarin tsaro wanda ya hana shi samun muƙamin minista.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Meyasa El-Rufai zai je kotu?
Tsohon gwamnan yana son wanke kansa ne bayan da wasu masu sharhi suka ce zai ƙalubalanci sake tsayawa takarar Shugaba Tinubu a 2027.
Rahotanni sun ce na kusa da El Rufa’i sun bayyana cewa gwamnatin Tinubu ta wulaƙanta tsohon gwamnan a bainar jama’a.
Rashin samun muƙamin na El-Rufai ya ba na kusa da shi mamaki duba da irin rawar da ya taka wajen sanya gwamnonin Arewacin Najeriya suka marawa Tinubu baya a lokacin zaɓen 2023.
Jaridar Vanguard ta ambato wani na kusa da El Rufai yana cewa:
"Kuna tunanin cewa Mallam zai bari wannan tambarin ya tsaya a kansa? Ina mai tabbatar muku da cewa zai wanke sunansa a gaban kotu."
El-Rufai ya gana da shugabannin SDP
A wani labarin kuma, kun ji cewa Tsohon gwamnan jihar Kaduna, Malam Nasir Ahmed El-Rufa'i ya ziyarci shugabannin jam'iyyar adawa ta SDP.
Tsohon gwamnan ya kai wannan ziyarar ne yayin da ake ci gaba da raɗe-raɗin cewa yana shirin tattara ƴan komatsansa ya fice daga jam'iyyar APC mai mulki.
Asali: Legit.ng