- Rundunar sojojin sama ta yi ruwan wuta kan sansanonin manyan ƴan bindiga a jihohin Kaduna da Katsina da ke Arewa maso Yamma
- Yayin luguden wutar da sojojin suka yi, ƴan bindiga da dama sun bakunci lahira kuma an lalata kayan aiki da sasanoninsu
- Sojojin sun samu wannan nasara ne a ƙaramar hukumar Giwa a Kaduna da yankin karamar hukumar Ƙanƙara a jihar Katsina
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Luguden wutar da rundunar sojojin saman Najeriya ya yi kaca-kaca da sansanin ƴan bindiga a yankin ƙaramar hukumar Giwa a jihar Kaduna.
Mai magana da yawun rundunar sojin sama (NAF), Edward Gabkwet ne ya bayyana haka a wata sanarwa da ya rattabawa hannu ranar Talata.
Gabkwet ya ce dakarun rundunar sojin Operation Whirl sun kai wannan samame ta sama ne a tsakanin ranakun 30 da 31 ga watan Mayun 2024, Channels tv ta ruwaito.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Ya ce:
"Sojojin sama sun saki ruwan bama-bamai a sansanin kasurgumin ɗan bindiga, Buharin Yadi da ke jejin Bula a ƙaramar hukumar Giwa ya jihar Kaduna.
"An kai wannan samamen ne bayan tattara bayanan sirri a wurin da ake hari, inda aka gano tarkace da bukkoki da cikin ƙungurmin jejin."
Bayanan da aka tattara sun nuna an hangi ƴan bindiga ɗauke da mugayen makamai a wurin, kuma an hangi babuta 13 a karaƙashin wata bishiya.
A cewar kakakin NAF, bayan haka ne rundunar sojojin ta tura ɗaya daga cikin jiragen yaƙi ya kai farmaki wurin bayan gano ƴan bindiga na da hannu a hare-haren Birrnin Gwari da Giwa.
Ya ce a binciken da aka yi an gani cewa ƴan bindiga da dama sun bakunci lahira yayin da faramkin ya ƙona sansaninsu a dajin.
Rundunar sojin sama ta Operation Hadarin Daji ta kai hare-hare makamancin wannan a ranar 2 ga watan Yunin 2024 a jihar Katsina, rahoton Leadership.
Sojojin sun saki bama-bamai bayan bayanan sirri sun gano wurin da shugaban ‘yan bindiga, Alhaji Iliya tare da tawagarsa suke a tsaunin Zango a karamar hukumar Kankara.
Bayan haka aka tura jirgin yaƙi ya ragargaji ƴan bindigar tare da lalata muhimman kayan aikinsu.
An sace malaman jami'ar Dutsinma
A wani rahoton kuma wasu lakcarori biyu a Jami'ar Tarayya a Dutsinma sun gamu da iftila'i bayan ƴan bindiga sun yi awon gaba da su a jihar Katsina.
Lamarin ya faru ne da safiyar jiya Litinin 3 ga watan Yuni a karamar hukumar Dutsinma da ke jihar a Arewacin Najeriya.
Asali: Legit.ng