ከባድ የአየር ንብረት ለውጥ በዓለም አቀፍ ደረጃ ባስከተለው ከፍተኛ ሙቀት የተነሣ፣ የጅቡቲ ተመላላሽ በኾኑ የከባድ መኪና አሽከርካሪዎች ላይ የሞት እና የጤና እክል ማጋጠሙን፣ የኢትዮጵያ የከባድ መኪና አሽከርካሪዎች ማኅበር አስታወቀ።

ማኅበሩ እና አስተያየታቸውን ለአሜሪካ ድምፅ የሰጡ የከባድ መኪና አሽከርካሪዎች፣ የተቀናጀ የወረፋ ሥርዓት አለመኖሩ፣ አሽከርካሪዎች፣ ከፍተኛ ሙቀት ባለበት ጅቡቲ ውስጥ ለረጅም ቀናት እንዲቆዩ እያደረጋቸው መኾኑ፣ ለአሽከርካሪዎቹ ኅልፈት እና ለጤና እክል ምክንያት እየኾነ እንዳለ ገልጸው ቅሬታቸውን ያሰማሉ፡፡

የነዳጅ አቅራቢ ባለንብረቶቸም ኾኑ ጉዳዩ የሚመለከተው መንግሥታዊ አካል፣ ዘመናዊ አሠራርን በመከተል በአሽከርካሪዎች ላይ የሚደርሰው ጉዳት እንዲቀንስ አስፈላጊውን እንዲያደርጉ ጠይቀዋል፡፡

የኢትዮጵያ የፈሳሽ ጭነት ማጓጓዣ ባለንብረቶች ማኅበር፣ ጅቡቲ ውስጥ አሽከርካሪዎች ተራቸውን በመጠበቅ የሚደርስባቸውን መጉላላት ለማስተካከል ውይይት ለማድረግ መታቀዱን አመልክቷል፡፡