Maniyyata aikin Hajjin bana sama da miliyan da rabi ne suka isa birnin Makka na kasar Saudi Arebiya domin sauke farali, inda ake sa ran isowar wasu da dama nan gaba, in ji hukumomin kasar.

Hukumomin kasar sun ce suna sa ran mahajjatan bana su zarta na bara da aka samu sama da miliyan daya da dubu dari takwas. Ko a shekarar 2019 maniyyata kusan miliyan biyu da rabi ne suka gudanar da aikin Hajjin.

Daga cikin maniyyatan bana akwai Falasdinawa dubu hudu da dari biyu daga gabar yamma da kogin Jordan, amma banda na yankin Gaza sakamakon yakin sama da watanni 8 da suke fuskanta.