Ministan wasanni John Enoh ya ce za a kaddamar da sabon kocin Super Eagles nan da makonni biyu masu zuwa.

Matsayin ya kasance ba kowa tun bayan karewar kwantiragin Jose Peseiro a karshen watan Fabrairu.

Rahotanni sun bayyana cewa kwamitin kwararru na hukumar kwallon kafa ta Najeriya (NFF) ya tantance kociyoyin guda uku da za su jagoranci tawagar.

"Abin da zan iya tabbatarwa shine babbar kungiyar kwallon kafa ta kasa za ta sami sabon koci nan da mako guda ko kuma makwanni biyu masu zuwa," in ji ministan ya shaida wa Channel Sports.

Enoh ya kuma ce hukumar ta NFF ta dauki lokacinta wajen yin kwakkwaran aiki domin ganin Super Eagles ta samu gurbin shiga gasar cin kofin duniya bayan da ta fara rashin kyau.

Idan dai za a iya tunawa, Super Eagles ta yi canjaras a wasanninta biyu na farko a gasar cin kofin duniya da Lesotho da Zimbabwe a watan Disambar da ya gabata.

Enoh ya kara da cewa "An fara kamfen na gasar cin kofin duniya na gaba kuma ba mu fara da kyau ba, abin girgiza ne, don haka akwai nisan tafiya."

"Ba mu cancanci zuwa gasar cin kofin duniya na karshe ba kuma ba za mu iya samun damar kasancewa a bugu na gaba ba.