Wia dis foto come from, Getty Images
Di Nigerian Meteorological Agency (NiMet) don warn say increased rainfall go shelle for Nigeria throughout di month of July, especially for north and north-central states.
NiMet predict say 13 states of di kontri go witness heavy rainfall for days.
Di agency, say di state wey dey affected fit witness flash floods for roads, bridges and low-lying areas wey fit cause traffic.
Di warning na sake of Madden-Jullian Oscillation wey sabi pipo say go dey strong for West Africa.
NiMet futher tok say di rain wey go fall dey expected to “increase both frequency and force.
Dem say e go be combine of irregular and continuous rains go fall for southern cities.
Dem advise say make Nigerias cover bodi well well during dis period to avoid cold-related sickness sake of say cooler temperatures go dey for days and nights sake of cloudy atmosphere
Di waether agency also yarn say ‘Dry Spell’ and ‘Little Dry Season (LDS)’ wey pipo sabi as mid-summer drought go shele.
Di mid-summer drought na wen di weather dey dry for long time wey no normal and dis shele same time towards di end of July.
“Di dry Spell dey expected to affect di Central and Northern States di most, expect lean rainfall for dis region,” dem tok.
On Wednesday 3 of July, some states bin witness heavy rain fall wey affect normal daily activity especially for Lagos.
Meanwhile di minister for Water resources and Sanitation, Joseph Utsev bin advise state goment say make dem clear drainages in order to avoid flood gbege.
Utsev tok say “We dey call on states and local goment councils, to increase and step up efforts to avoid flood-related disasters for dia domains as we approach di peak of di flooding season.
“For di national, some states don start to experience some level of flooding and im associated disaster as of April dis year.
“So far, more dan three states like di FCT don experience high levels of flooding, wit several casualties recorded, including displacement of pipo and loss of properties”, Utsev add.
States wey go witness heavy rains
Wia dis foto come from, Getty Images
Nigerian Meteorological Agency (NiMet) bin list di following states as thpose wey go witness heavy rains.
Niger, Plateau, Benue, Kaduna, Taraba, Delta, Imo, Cross River, Akwa Ibom, Rivers
Bayelsa, Ekiti and Osun states
Below na di states wey Nimet fit witness light to heavy rains
Lagos, Edo, Kano, Borno, Zamfara, Gombe, Adamawa, Kogi, Kwara, Nasarawa, Ogun
Also, di minister for water resouces and Sanitation, Joseph Utsev bin tell tori pipo say flooding dey expected for start of July, and states wey fit witness am na;
Akwa Ibom, Anambra, Adamawa, Benue, Bayelsa, Cross River, Delta, Edo, Jigawa, Kogi, Kebbi, Kaduna, Niger, Nasarawa, Ondo, Ogun, Rivers, Taraba and the FCT.
Ways to prevent flooding for your area
NiMet advise di public to make sure say dem clear all drainage systems and properly maintain to prevent flash flooding during dis time.
Clear drainage systems and canals.
Pipo along waterways must clear mud, sand and odas from dia gutters.
Authorities for local and state level need collect runoff water
Regularly clear dirty from drains and ditches.
Check for and seal openings and cracks for your foundation- dis go prevent water wey wan enta your foundation.
Inspect and upgrade drains. No just do drainage and leave am, weak drainage fit collapse if e no dey upgraded.
Keep sandbags for your house. Incase flooding shele and water don begin near your house, block your domot and oda parts wit sand bags- e dey very useful for emergency.