• Maharan sun yi garkuwa da wani mai riƙe da sarauta, Madakin Shabu Musa Shu'abu jim kaɗan bayan ya fito daga masallaci a Nasarawa
• Jami'in hulɗa da jama'a na rundunar ƴan sandan jihar, Rahman Nansel ya ve tuni dakarun ƴan sanda suka bazama domin ceto mutumin
• Ganau sun bayyana cewa maharan sun buɗe wuta domin tsorata mutane, kana suka yi awon gaba da Madaki a daren ranar Alhamis

Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Jihar Nasarawa - Wasu ‘yan bindiga sun yi garkuwa da wani mai rike da sarautar gargajiya a jihar Nasarawa, Madakin Shabu, Musa Shuaibu.

Maharan sun yi awon gaba da basaraken ne jim kaɗan bayan ya fito daga Masallaci ranar Alhamis da ta gabata, 20 ga watan Yuni, 2024 da yammaci.

Jami'in huƙɗa da jama'a na rundunar ƴan sanda ta jihar Nasarawa, DSP Rahman Nansel ya tabbatat da faruwar lamarin ga Channels tv.

LURA: Shin kana son bamu labari da tattaunawa da marubutanmu? Tuntubemu a info@corp.legit.ng

A cewarsa, an yi garkuwa da Shuaibu ne da yammacin ranar Alhamis bayan da ya yi Sallah a wani Masallaci da ke kusanda gidansa a Shabu.

Ya kara da cewa dakarun ƴan sanda na ci gaba da kokarin kubutar da mutumin tare da damke wadanda suka aikata laifin domin gurfanar da su a gaban kuliya.

Lamarin wanda ya faru da misalin karfe 08:00 na daren ranar Alhamis ya jefa mazauna yankin cikin tashin hankali yayin da maharan suna buɗe wuta a iska.

Ganau sun shaidawa jaridar Vanguard cewa an yi garkuwa Madakin Shabu ne ‘yan mintuna kadan bayan Sallar isha’i a masallacin Shabu a kan babbar hanya.

A cewar ganau, masu garkuwan sun zo da shirin kashe duk wanda ya kawo masu cikas, lamarin da ya sa sauran masallata da ‘yan kasuwa suka tsere cikin tsoro.

Lamarin tsaro na ƙara taɓarɓarewa a yankin duk da matakin taƙaita zirga-zirga daga faɗuwar rana zuwa wayewar garin da aka ɗauka da nufin dawo da zaman lafiya.

Ƴan bindiga sun kashe amarya

A wani rahoton kuma mahara sun yi ajalin amarya mako ɗaya da ɗaura mata aure gabanin ta tare gidan mijinta a jihar Anambra ranar Litinin.

Lamarin ya faru ne yayin da ƴan bindiga masu tilasta bin dokar zaman gida suka kai farmaki kauyuka biyu, inda suka kashe mutane da yawa.

Asali: Legit.ng