Majalisar Wakilan Faransa ta amince da kudirin da ke yin Allah-wadai da kisan kiyashin da ‘yan sandan kasar suka yi wa gomman ‘yan Algeria a shekarar 1961 lokacin da suke zanga-zangar goyon bayan ‘yancin kasarsu ta arewacin Afrika.
Wallafawa ranar: 28/03/2024 - 17:58
Minti 1
A shekarun baya-bayan nan Faransa na ta yunkurin ganin ta gyatta alakarta da Algeria dangane da jerin cin zarafin da suka faru a lokacin mulkin mallakar da ta yi wa kasar ta arewacin Afrika, sai dai duk da hakan an gaza kai ga jituwa tsakanin bangarorin biyu.
Daruruwan ‘yan Algeria da ke zanga-zangar goyon bayan ‘yancin kan kasar a shekarar 1961 ne suka rasa rayukansu bayan da ‘yan sandan Paris suka bude musu wuta a wani yanayi da aka bayyana da kisan kiyashi lamarin da tun a shekarar 2021 shugaba Emmanuel Macron ya amsa laifin kasarsa tare da neman afuwar Algria game da abin da ya faru.
Daftarin kudirin wanda jam’iyyar Greens karkashin jagorancin Sabrina Sebaihi ta gabatar gaban majalisar ya samu goyon bayan ‘yan majalisa 67 wasu 11 kuma suka kalubalance shi.
Bayan nasarar da kudirin ya samu a zauren majalisar, ‘yar majalisa Sabrina ta bayyana nasarar da matakin farko wajen ayyana kisan kiyashin a matsayin laifi marar muni da ‘yan sandan na Faransa suka aikata kan al’ummar Algeria.
Yayin gangamin cika shekaru 60 da aikata kisan kiyashin da ya gudana a shekrar 2021, shugaba Macron da kansa ya amsa cewa tarin masu zanga-zangar da ‘yan sandan na Faransa suka kashe a wancan lokaci sun jefa gawarwakinsu a cikin rijiya.