'Yan Bindiga Sun Hallaka Jami'an Tsaro da Sace Mutum 20 a Kaduna
Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi
Jihar Kaduna - Wasu ƴan bindiga sun kai hari a sansanin ƴan banga a yankin Shuwaka a yammacin dajin Kamuku da ke ƙarƙashin gundumar Kakangi a ƙaramar hukumar Birnin Gwari ta jihar Kaduna.
Harin wanda ya auku a yammacin ranar Talata, ya yi sanadiyyar mutuwar ƴan banga uku tare da yin garkuwa da wasu mutanen ƙauyen sama da 20.
Lamarin dai na zuwa ne ƙasa da sa'o'i 48 da ƴan bindiga suka kashe ƴan banga huɗu da ɗan sanda a ranar Lahadi da yamma, cewar rahoton jaridar Daily Trust.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Wata majiya mai tushe, wacce ɗan uwanta na cikin waɗanda aka sace a harin na baya-bayan nan, ta bayyana cewa, ƴan bindigar sun farmaki sansanin ne saboda muhimmancin da yake da shi.
"An kashe ƴan banga uku da yammacin ranar Talata lokacin da ƴan bindiga suka kai hari a sansaninsu da ke yankin Shuwaka a yammacin dajin Kamuku da ke ƙarƙashin gundumar Kakangi."
"An kuma sace sama da mutane 20 daga gonakinsu a Kurgin Gabas a yankin Sabon Layi."
- Wata majiya
Ɗan majalisa mai wakiltar mazaɓar Kakangi a majalisar dokokin jihar Kaduna, Yahaya Musa Dan Salio ya tabbatar da faruwar lamarin, wanda ya bayyana lamarin a matsayin abin damuwa.
Hakazalika, Ishaq Kasai, tsohon shugaban ƙungiyar ci gaban masarautar Birnin Gwari (BEPU), ya tabbatar da faruwar lamarin.
Sai dai, ba a samun jin ta bakin kakakin rundunar ƴan sandan jihar Kaduna ba, ASP Mansir Hassan.
A wani labarin kuma, kun ji cewa wasu ƴan bindiga da ba a san ko su waye ba sun yi garkuwa da wani jami’in ƴan sanda da kuma direban da ke aiki tare da wani basarake mai daraja a jihar Rivers.
Ƴan bindigan sun yi garkuwa da mutanen ne a ranar Asabar a gidan mai martaba, Cif Cornwell Ihunwo da ke kusa da tsibirin Eagle Island.
Asali: Legit.ng