Wurin Da Ya Fi Ba Ni Wahala A Daukar Shirin Labarina – Hadiza Abubakar
Da farko za ki fada wa masu karatu cikakken sunanki tare da sunan da aka fi saninki da shi.
Sunana Hadiza Abubakar wacce aka fi sani da Ummi Gombe.
Ko za ki iya fada wa masu karatu dan takaitaccen tarihinki?
Kamar yadda na fada a baya sunana Hadiza Abubakar wacce aka fi sani da Ummi Gombe, an haife ni a Kumo Jihar Gombe, kuma na tashi a garin Gombe.
A wanne mataki kika tsaya a karatunki?
Na tsaya da karatuna a matakin Sakandare.
Ya batun komawa makaranta dan ci gaba da karatu, shin akwai ra’ayin hakan ko babu?
Ina nan ina shiri yanzu haka ma abin da nake kokarin yi kenan.
Kin taba yin aure ko tukunna dai?
Eh! Na taba yin aure.
Akwai yara ko babu?
Ina da yaro guda daya.
Me ya ja hankalinki har ki ka tsunduma cikin masana’antar Kannywood?
Abin da ya ja hankalina gaskiya ni dai na taso da sha’awar abun ne tun ina karama.
Wane rawa ki ke takawa a cikin masana’antar Kannywood?
Ina taka rawar matsayin jaruma.
Ya gwagwarmayar shiga cikin masana’antar ta kasance?
An sha gwagwarmaya sosai gaskiya.
Lokacin da ki ka fara sanar da iyayenki kina son fara harkar fim, shin kin fuskanci wani kalubale daga gare su ko kuwa?
Ban samu wani kalubale daga gare su sosai ba, addu’a kawai suka yi mun.
Za ki yi kamar shekara nawa ko wata nawa da fara fim?
Eh! To, ba zai wuce kamar shekara takwas ba.
Da wane fim ki ka fara?
Na fara fitowa a fim din Wuta Biyu.
Ya farkon farawar ya kasance?
Kin san duk abin da aka ce farko ne to dole akwai faduwar gaba.
Kin yi finafinai sun kai kamar guda nawa?
Nayi finafinai masu dan yawa ciki akwai; Bikin Suna, Zabi, da dai sauransu, sannan a yanzu ina daya daga cikin jaruman shiri me dogon zango na Labarina.
Wace rawa ki ka taka a cikin shirin Labarina?
Na fito a Yasmeen kawar Maryam.
Ta ya kika tsinci kanki a cikin shirin Labarina?
Ina daune Darakta Aminu Saira ya sa aka kira ni aka ce an yi ‘casting’ dina a fim din Labarina.
Cikin finafinan da ki ka fito ciki, wanne ne ya zamo bakandamiyarki?
Kowanne amma ina son Labarina.
Wane waje ne ya fi burge ki a cikin shirin Labarina?
Wajen da kawata Safina ta sammun Dalar da ta samo.
Ko akwai wani waje da ya fi baki wahala cikin finafinan da ki ka fito wanda ba za ki iya mantawa da shi ba?
A cikin shirin Labarina wajen da muka kai Maryam muka fito bayan na sha aiki sai jiri ya biyo baya ga kuma gajiyar aikin da muka gama.
Kamar wane irin nasarori kika samu game da fim?
Gaskiya Alhmdulillah na samu nasarori da yawa.
Ko akwai wani kalubale da ki ka taba fuskanta cikin masana’antar bayan shigarki?
Ba za a rasa ba tunda a rayuwa ba a rasa kalubale, sai dai na ce Alhamdulillah.
Kina da Ubangida a cikin masana’antar Kannywood?
Duk wanda ya taba sani ko niyyar sani ubangidana ne.
Wadanne jarumai ne suke burge ki kafin ki fara fim?
Shi fim din ne yake burge ni.
Mene ne burinki na gaba game da fim?
Burina shi ne nayi shuhra bayan haka kuma sai aure.
Ko akwai wanda ya taba cewa yana son ki cikin masana’antar da har ta kai da kun fara soyayya?
Eh! To, ba za a rasa ba.
Kamar wane irin namiji ki ke son aura?
Wanda Allah ya zaba min tunda ba lalle wanda kake so ya zama mafi alkairi a tare da kai ba.
Bayan fim kina wata sana’ar ne?
Eh! Ina siyar da kayayyaki kamar su; Atampha, Takalma da sauransu.
Ko akwai wani kira da za ki yi ga sauran abokan aikinki?
Ina kira gare su da mu kara hada kanmu mu zama tsintsiya madaurinki daya.
Wane irin kira za ki yi ga masu kokarin shiga cikin masana’antar Kannywood?
Kira na ga masu sha’awar shiga masana’antar Kannywood su tabbata da izinin iyayensu za su shiga.
Me za ki ce da masoyanki?
Ina yi musu godiya Allah ya bar mu tare kuma idan nayi kuskure su yi kokarin nusar da ni ta yadda zan fahimta.
Ko kina da wadanda za ki gaisar?
Ina gaida duk masoyana.